Historiku i themelimit

Nga dëshira e përbashkët për të krijuar një grup tifozësh për të mbështetur vetëm Kombëtaren, disa djem shqiptarë nga treva të ndryshme të Shqipërisë një ditë të ftohtë fundviti vendosën të nisin një lëvizje të re, e cila me kalimin e kohës u bë grupi më i njohur i mbështetësve të kombëtares shqiptare.

Këta mbështetës që morën pjesë në krijimin dhe themelimin e kësaj lëvizjeje janë: Burim Hana, Valentin Muhaxheri, Faruk Halimi, Anton Berishaj, Artor Behluli, Fitim Xharra, Dardan Ibrani, Fatos Berisha dhe Luan Xhafolli. Ata fillimisht krijuan një grup të përbashkët në e-mail ku të gjithë pjesëmarrësit filluan të diskutojnë rreth kësaj nisme të përbashkët. Tema kryesore e diskutimit ishte emri dhe qëllimi i kësaj nisme. Pas shumë propozimesh dhe një votimi të ngushtë në mes emrave "Albholics" dhe "Tifozat Kuq e Zi", emri i dytë u zgjodh.

Më 25 dhjetor 2003, ditën e Krishtlindjes, grupi u pagëzua me emrin "Tifozat Kuq e Zi". Para publikut të gjerë Tifozat Kuq e Zi për herë të parë u prezantuan më 2 shkurt 2004, ditën e Bajramit. Këto dy data, njëra ditën e Krishtlindjes e tjetra ditën e Bajramin, transmetojnë edhe simbolikisht mesazhin e bashkimit të të gjithë shqiptarëve pa dallim besimi.

Shumë shpejt, TKZ-ja u bë një ndër tifozeritë më të njohura, jo vetëm në Shqipëri, por edhe jashtë saj, duke formuar rrjete në Austri, Gjermani, Angli, Zvicër, Suedi, Belgjikë, Francë, etj., e deri në Amerikën e largët dhe në Kanada. Mbi të gjitha TKZ-ja kultivon zemrën e madhe të shqiptarëve si komb dhe shpirtin e vetëbesimit drejt fitoreve të mëdha. Kjo lëvizje ka lënë një gjurmë të thellë në ndeshjet e kombëtares dhe mbështetjen e të gjithë sportistëve që përfaqësojnë ngjyrat kuq e zi dhe kulturën tifozerike shqiptare.

Sot, TKZ-ja është bërë simbol i bashkimit dhe pasionit për sportin dhe flamurin kuqezi, duke i bërë shqiptarët bashkë dhe duke u dhënë atyre një zë që i këndon identitetit të përbashkët. Mirënjohja më e madhe u takon atyre që ndihmuan në çdo hap të rrugës, që besuan në këtë vizion dhe ndihmuan që kjo lëvizje të bëhet ajo që është sot.

Historia e zhvillimit të Tifozave Kuq e Zi është dëshmi për forcën dhe shpirtin e shqiptarëve dhe mënyrën se si ata janë bashkuar për një arsye të madhe, duke lënë gjurmë të pashlyeshme në historinë e sportit shqiptar. TKZ-ja ndër vite bëri bashkë mijëra djem e vajza që kishin dashuri të pashoqe për sportin shqiptar dhe për flamurin kuqezi. Megjithatë, ajo që e dallon këtë grup nga të tjerët është dëshira për t'i bashkuar shqiptarët, pa dallim qyteti a krahine.

Me flamurin kuqezi kudo e kurdo, Tifozat Kuq e Zi janë dëshmi e fortë për ndjenjat kombëtare dhe pasionin e shqiptarëve, të cilët, kur janë të bashkuar, mund të arrijnë çdo gjë.